Vieiros

A resolución do xulgado do social número 2 de Santiago de Compostela, notificada o 23 de xaneiro, consideraba probado que unha traballadora da COPE fora despedida pola súa opción sexual (casara cunha muller) e pola súa militancia política (pertencía ao BNG), e ordenaba á emisora que a readmitise e lle pagase os salarios pendentes. Segundo denuncia a Mesa pola Normalización Lingüística, foi naquel momento cando os avogados da COPE anunciaron ao xulgado o seu descoñecemento do galego e esixiron a tradución da sentenza.

A demanda presentárase en galego e así se tramitou. Os avogados da Cope responderon á demanda sen se queixaren da lingua empregada, e continuouse o procedemento en galego "con toda normalidade". Finalmente, o día do xuízo, "cada testemuña expresouse na lingua que quixo, e a acta está redactada en galego e en castelán".

Agora, a instancias da demanda dos avogados da COPE, o Consello Xeral do Poder Xudicial (CXPX) abriu unhas dilixencias previas contra a titular do xulgado do social número 2 de Santiago de Compostela, Ana López-Suevos, acusándoada de "sectarismo e partidismo" polos avogados da Cadea COPE por ter permitido a utilización do galego. A emisora aduce que o seu avogado dixéralle á xuíz que o castelán é o único idioma que coñece e que, aínda así, a maxistrada permitiu o uso do galego. López-Suevos négao con rotundidade e xa fixo chegar ao CXPX unha certificación da secretaria xudicial que dá fe de como se desenvolveu o xuízo.

Denuncia da Mesa
A Mesa pola Normalización Lingüística amosou o seu total apoio e solidariedade coa maxistrada inxustamente investigada e esíxelle ao CXPX "o inmediato arquivo das actuacións que se seguen contra ela a nivel informativo". Así mesmo, a Mesa denuncia o emprego destas queixas como elemento amedrentador dos xuíces e xuízas "que optan libremente por empregar o galego como lingua vehicular do xulgado e que respectan escrupulosamente os dereitos lingüísticos de todos os intervenientes no proceso".

Finalmente, considera a actuación da COPE "tácticas xurídicas burdas e zafias" para disimular o verdadeiro fondo deste asunto: "que os letrados da Cope foron derrotados xustamente nun procedemento xudicial por despedir a unha traballadora por móbiles homófobos e políticos".