Vieiros

Esquerra Republicana trasladou unha oferta formal ao Bloque Nacionalista Galego (BNG) para que se integre na coalición Europa dos Pobos, da que xa forman parte Eusko Alkartasuna e a Chunta Aragonesista e á que podería incorporarse Aralar, para concorrer xuntos ás eleccións europeas do próximo 7 de xuño, segundo informaron a Europa Press fontes de ERC.

Nos anteriores comicios europeos, o BNG concorreu en coalición con CiU e o PNV, os seus socios de Galeuscat, non obstante, estas tres formacións aínda non decidiron se repetirán a fórmula para as eleccións de xuño. Dende ERC mostran un absoluto respecto coa reflexión interna que se está a dar no BNG sobre a posibilidade de volver concorrer cos nacionalistas cataláns e vascos, pero optaron por lanzarlles un convite formal para incorporarse, se o consideran oportuno, á Europa dos Pobos.

O BNG aínda non iniciou internamente o debate oficial sobre os comicios europeos, aínda que o próximo luns abrirá a discusión nunha reunión da Executiva en funcións.

Soberanistas de esquerdas
Os republicanos, que encabezan a coalición coa que lograron un eurodeputado nos comicios europeos de 2005, queren sumar o BNG para reforzar así a marca 'soberanista e de esquerdas' que queren presentar como alternativa progresista a unha posíbel coalición CiU-PNV.

Nas últimas semanas, ERC tivo tamén contactos con outras forzas políticas para intentar atraelas á súa candidatura europea. Así o fixo con Aralar, formación que pasou dun a catro escanos nas eleccións vascas do pasado 1 de marzo, e que podería formalizar a súa integración na Europa dos Pobos esta mesma fin de semana.Os independentistas cataláns tamén abriron contactos co Partido Socialista de Mallorca, Entesa per Mallorca, Els Verds-Conferederación Ecologista de Catalunya e Nova Canarias, unha escisión de Coalición Canaria.