Vieiros

Cunha folga prevista para a vindeira semana, os traballadores e representantes dos comités de Seaga pecháronse este xoves na Consellaría de Medio Rural. O obxectivo é exercer máis presión e dar a coñecer a problemática pola que está a pasar o conxunto do cadro de persoal desta empresa subcontratada por Medio Rural para realizar as labores de prevención e extinción de incendios.

Segundo explica María Rodinho, representante do comité da Coruña, Seaga prescindiu nos últimos tres meses de 150 traballadores dos 918 que conformaban o cadro de persoal antes dos comicios electorais. "Pedimos que nos expliquen cales son os criterios que se están a seguir para proceder aos despedimentos", di, "entendemos que co cambio de goberno se introduzan modificacións, que prefiran outro deseño organizativo para este labor, mais exiximos transparencia e información". O que se temen os responsábeis sindicais é que o actual goberno quere botar aos empregados que levan dous anos na entidade para evitar facerlles un contrato indefinido xa que, por lei, deberían deixar de ser temporais, e poder así contratar a outras persoas "máis afíns". Con todo, explican que os despedimentos acometidos até o de agora non foron só a persoas que levasen ese tempo contratados, polo que non entenden o criterio empregado.

Campaña contra incendios
"Estamos iniciando este proceso de protesta antes de que se inicie a campaña contra incendios", explica Rodinho, "porque non queremos que se nos acuse de desatender os lumes ou o noso traballo; ante todo somos profesionais". Pero, de seguir así as cousas, os traballadores lamentan que non poderán afrontar unha situación de emerxencia por incendios con garantías: "queremos ter moi claro como vai a articularse todo, cantos seremos, cales serán as nosas funcións... e que non suceda o de outros anos, que non contamos con equipos de protección até última hora ou fixemos xornadas laborais de moitas horas".

"Botan a xente que leva máis tempo, que ten experiencia, e iso non o podemos entender", insite Rodinho, alertando das dificultades engadidas para afrontar con garantías a extinción e prevención de incendios. Ademais, "tamén despediron a traballadores das UXFOR, deixando a limpeza de moitos montes paralizada", co consecuente risco que isto engade.