Vieiros

O novo departamento da Xunta encargado de todos os asuntos relacionados coas novas tecnoloxías, a Secretaría Xeral de Modernización e Innovación Tecnolóxica, dependente da Presidencia, levará ao Consello deste xoves un Plan de medidas urxentes no ámbito das tecnoloxías da información e a comunicación.

Segundo anunciou a secretaria xeral, Mar Pereira, o plan marcará a "folla de ruta no curto prazo", con actuacións inmediatas como a "identificación de proxectos claves na lexislatura", para fixar as prioridades no sector.

A responsábel de Modernización anunciou, ademais, que este mes de xullo se acometerá a licitación do Plan estratéxico global da Xunta de Galicia. Porén, non especificou se supoñerá un complemento, unha modificación ou a derrogación do vixente Plan estratéxico galego da sociedade da información (PEGSI), do que semella non haber constancia no Goberno. O novo texto contará, segundo Pereira, coa "participación activa dos diferentes axentes sociais", e convertendo o investimento en novas tecnoloxías como "un instrumento esencial para promover a equidade, a sustentabilidade e a calidade dos servizos públicos".